काठमाडौं । लामो समयदेखि रोकिएको न्यायाधीश नियुक्ति प्रक्रिया सुरु भएको छ ।

न्याय परिषदको बैठकले केही दिनअघि सर्वोच्च अदालतमा न्यायाधीश नियुक्तिका लागि विनोद शर्मालाई सिफारिस गरेको थियो । संसदीय सुनुवाइ समितिले शुक्रबार शर्माको नाम सर्वसम्मत अनुमोदन गरेको छ ।

न्याय परिषद्को बैठकले उच्च अदालतको रिक्त न्यायाधीश नियुक्तिका लागि २७ जनाको नाम सिफारिस गरेको छ। प्रधानन्यायाधीश एवं न्याय परिषद्का अध्यक्ष विश्वभरप्रसाद श्रेष्ठको अध्यक्षतामा शुक्रबार बसेको परिषद्को बैठकले सिफारिस गरेको हो।

न्याय ,कानुन, सरकारी वकिल, कानुन व्यवसायी र कानुन मन्त्रालयसहितका योग्यता पुगेका व्यक्तिलाई समेटेर नियुक्तिको सिफारिस गरिएको न्याय परिषद्ले जनाएको छ।

परिषद्‌मा अध्यक्षको रुपमा प्रधानन्याायधीश श्रेष्ठ ,कानुनमन्त्री धनराज गुरुङ, वरिष्ठतम् न्यायाधीश ईश्वरप्रसाद खतिवडा र न्याय परिषद्का दुई सदस्यहरु रामप्रसाद श्रेष्ठ र रामप्रसाद भण्डारी रहेका छन्।

२०७८ देखि रोकिएको न्यायाधीश नियुक्तिको गाँठो प्रधानन्यायाधीश श्रेष्ठले फुकाएका हुन्। यो सँगै अब उच्च अदालतको मुख्य न्यायाधीश हुँदै सर्वोच्चसम्म नियुक्तका लागि सिफारिस सुरु हुने देखिन्छ।