काठमाडौं । पुर्नजागरण साप्ताहिकका संस्थापक सम्पादक÷ प्रकाशक तथा प्रजातन्त्र प्राप्तिको अथक योद्धा माथवरसिंह बस्ने ७६ वर्षको उमेरमा गोलोक प्रस्थान गर्नुभएको
छ । बस्नेतलाई गम्भीर मस्तिष्कघात भएपछि उपचार गर्न अस्पताल भर्ना गरिए पनि उहाँको उपचार हुन सकेन । शनिबार विहान निधन भए पश्चात पशुपति आर्यघातमा अन्त्येष्टि गरिएको थियो ।
आफुले सञ्चालन गर्दै आएको साप्ताहिक पत्रिका बन्द भएपछि मिसन पत्रकारिता गर्दै थिए । राष्ट्रिय समाचार समिति र प्रेस काउन्सिल नेपालका पूर्वअध्यक्ष समेत रहनुभएका पुराना पत्रकार बस्नेत भक्तपुरको सूर्यविनायक नगरपालिकास्थित कटुञ्जेमा बस्दै आउनुभएको थियो । उहाँलाई विहिबार राति घरमै हृदयघात भएपछि काठमाडौंस्थित अन्नपूर्ण न्यूरो अस्पताल भर्ना गरिएको थियो । बस्नेतका श्रीमती एक छोरा र एक छोरी छन् ।
स्वर्गीय बस्नेत पुराना पत्रकार मात्र नभएर एक राजनीतिक योद्धा पनि हुनुहुन्थ्यो । उहाँले गणेशमान सिंह सर्वमान्य नेताको नेतृत्वमा भएको संयुक्त जनआन्दोलनमा भाग लिएर ३० वर्ष लामो निर्दलीय तथा निरंकुश पञ्चायती व्यवस्थाको अन्त्य र संसदीय प्रजातन्त्रको पुर्नस्थापनामा संघर्ष समेत गर्नुभएको थियो । गणेशमान सिंह स्मृति वाटिकामा अध्यक्ष समेत रहनुभएका बस्नेतको निधनले नेपाली मिसन पत्रकारिताको विशाल खम्बा ढलेको विश्लेषकहरुले बताएका छन् । स्वर्गीय बस्नेतलाई पञ्चायत कालमा बम ओसार पसारको आरोपमा जन्मकैद सजाय दिइएको थियो । तर उदारवादी राजा श्री ५ वीरेन्द्रले २०३७ साल वैशाख १ गते कैदीबन्दीलाई आममाफी दिने क्रममा बस्नेतलाई पनि माफी दिएका थिए । माफी पाएर जेलबाट छुटे पछि २०३८ सालदेखि पत्रिका पुर्नजागरण साप्ताहिक दर्ता गरी निरन्तर पत्रकारिता गर्दै आउनुभएको थियो ।
