काठमाडौं । आगामी निर्वाचनको तयारी तीव्र भइरहेका बेला नेपाली कांग्रेसको अर्जुनदृष्टि मतदाता नामावली दर्ता अभियानमामा परेको छ ।
महामन्त्रीद्वय गगनकुमार थापा र विश्वप्रकाश शर्माले हस्ताक्षर गरेको परिपत्रमा पार्टीका सबै तहका समितिहरूलाई कात्तिक ३० गतेभित्र योग्य नागरिकहरूको नाम मतदाता सूचीमा अनिवार्य रूपमा दर्ता गराउने कार्यलाई “उच्च प्राथमिकता” दिन भनिएको छ।
कांग्रेसले यो पहललाई केवल प्रशासनिक कार्य नभई राजनीतिक सचेतना अभियानका रूपमा अघि बढाउने जनाएको छ। पार्टीका अनुसार, छठ पर्व सकिएलगत्तै सबै प्रदेश कार्यसमितिका पदाधिकारी र प्रतिनिधिहरूलाई जिल्लातहसम्म परिचालन गरिनेछ।
केन्द्रीय तहदेखि वडातहसम्म ‘मतदाता अभियानः
परिपत्रअनुसार, अब सबै जिल्ला र पालिका समितिहरूले अन्य सबै नियमित गतिविधि “थाती राखी” मतदाता दर्तामा केन्द्रित रहनुपर्नेछ। प्रदेश संसदीय दलका सदस्यहरूलाई पनि आफ्ना क्षेत्रमा प्रत्यक्ष संलग्न भएर नागरिकलाई मतदाता दर्ता गराउन प्रेरित गर्न निर्देशन गरिएको छ।
महामन्त्री गगन थापा र विश्वप्रकाश शर्माले संयुक्त रूपमा लेखेका छन् — “यो अभियान केवल नाम दर्ताको होइन, अधिकार सचेतनाको अभियान हो। नागरिकताबाट मताधिकारमा रुपान्तरण गर्न सबै कांग्रेस परिवारले सक्रिय भूमिका खेल्नुपर्छ।”
नयाँ मतदाता र युवाप्रति विशेष ध्यानः
परिपत्रमा विशेषगरी पहिलो पटक मतदान गर्ने युवाहरू र नागरिकता नलिएका नागरिकहरूलाई अभियानको केन्द्रमा राख्न भनिएको छ। पार्टीले जनाएको छ —“नागरिकता बनाएपछि सोही दिन मतदाता सूचीमा नाम लेखाउन सकिने कानुनी व्यवस्था स्पष्ट रूपमा सबैलाई बुझाउनुपर्छ।” यसका लागि स्थानीय तहका प्रतिनिधि र युवा समितिहरूलाई आवश्यक सूचना, फाराम र सहयोग सामग्री वितरण गरिनेछ।
‘जय नेपाल’सँगै सन्देश — मतदाता दर्ता नै लोकतन्त्रको ढोकाः
कांग्रेसले यो अभियानलाई राजनीतिक शक्ति प्रदर्शन नभई, लोकतान्त्रिक सहभागिताको बुनियादी अभ्यासका रूपमा चित्रित गरेको छ। परिपत्रको अन्त्यमा भनिएको छ — “मतदाता सूचीमा नाम लेखाउने प्रत्येक नागरिकले लोकतन्त्रको जग बलियो बनाउँछ। यही अभियान हाम्रो जिम्मेवारी र हाम्रो अभिमान हो — जय नेपाल।”
