नाइमाले आगामी श्रावण २६ गते देखि ३१ गते,(अगस्ट ११ देखि १६, २०२६) सम्म भृकुटी मण्डपमा नेपाल मोबिलिटी एक्स्पो २०८३ गर्ने ,
एक्सपोमा ५१ स्टल, ५५ भन्दा बढी ब्रान्ड र ४० भन्दा बढी नयाँ लन्च हुने
काठमाडौं,असार २२(वगलाई ६)गते। नेपाल अटोमोबाइल आयातकर्ता तथा उत्पादक संघ नाइमाले काठमाडौंस्थित द सोल्टी होटलमा पत्रकार सम्मेलन आयोजना गरी नाइमा नेपाल मोबिलिटी एक्स्पो २०२६ सम्बन्धी मुख्य विवरण सार्वजनिक गरेको छ। सञ्चारकर्मी, प्रायोजक तथा साझेदार संस्था, प्रदर्शक, नाइमा बोर्ड सदस्य, सदस्य कम्पनी तथा अटोमोबाइल र मोबिलिटी क्षेत्रका विभिन्न सरोकारवालाको उल्लेखनीय उपस्थितिमा एक्स्पोका प्रमुख कार्यक्रम र विशेषताबारे जानकारी गराइएको हो।
जानकारी अनुसार नाइमाले आगामी श्रावण २६ गते देखि ३१ गते( अगस्त ११ देख १६) सम्म राजधानीको भृकुटीमण्डपमा नाइमा नेपाल मोबिलिटी एक्स्पो २०८३(२०२६) गर्ने भएको छ । नेपालकै सबैभन्दा ठूलो अटोमोबाइल तथा मोबिलिटी प्रदर्शनीका रूपमा आयोजना हुने यस एक्स्पोमा ५१ स्टल, ५५ भन्दा बढी ब्रान्ड तथा ४० भन्दा बढी नयाँ उत्पादन र मोडल सार्वजनिक गरिनेछन्। प्रदर्शनीमा दुईपाङ्ग्रे, चारपाङ्ग्रे, व्यावसायिक सवारीसाधन, विद्युतीय तथा हाइब्रिड मोबिलिटी समाधान, प्रविधि, सेवा तथा मोबिलिटीसँग सम्बन्धित अन्य उत्पादनहरू समावेश हुनेछन्।
पत्रकार सम्मेलनमा नाइमा अध्यक्ष रितु सिंह वैद्यले नाइमा एक वर्षअघि २१ सदस्य कम्पनीबाट स्थापना भएको र हाल ३६ प्रमुख सदस्य कम्पनीसम्म विस्तार भएको जानकारी दिनुभयो। उहाँका अनुसार यो विस्तारले उद्योग क्षेत्रको विश्वास, एकीकृत मञ्चको आवश्यकता तथा नेपालको मोबिलिटी क्षेत्रको जिम्मेवार आवाजका रूपमा नाइमाको बढ्दो भूमिकालाई स्पष्ट रूपमा प्रतिबिम्बित गरेको छ।
उहाँले नाइमाको दृष्टिकोण “गतिशीलतामार्फत समृद्धि” र अभियान “सबैका लागि गतिशीलता” एक्स्पोमा मात्र सीमित नभई पहुँच, रोजगारी, उद्यमशीलता, सार्वजनिक सेवा प्रवाह तथा आर्थिक वृद्धिसँग जोडिएको नाइमाको समग्र कार्यदिशामा प्रतिबिम्बित भएको बताउनुभयो। उहाँले गतिशीलता सुधारिएसँगै अवसर विस्तार हुने र नागरिक तथा व्यवसाय सहज रूपमा अघि बढ्न सके देशको समग्र विकास सम्भव हुने धारणा व्यक्त गर्नुभयो।
अध्यक्ष वैद्यले नाइमाले गत वर्ष मोबिलिटी क्षेत्रको सुधारका लागि निरन्तर पैरवी गर्नुका साथै पहिलो संस्करणको एक्स्पो सफलतापूर्वक सम्पन्न गरेको, काठमाडौं उपत्यकाका १,६१० ट्राफिक प्रहरी कर्मचारीलाई क्षमता अभिवृद्धि तालिम उपलब्ध गराएको, क्षति पुगेका कार्यालयहरूको पुनःनिर्माणमा सहयोग गरेको तथा काठमाडौं उपत्यका ट्राफिक प्रहरी कार्यालय र यातायात व्यवस्था विभागलाई आवश्यक सहयोग प्रदान गरेको जानकारी दिनुभयो। साथै, सरकारी निकायसँग सहकार्य गर्दै ट्राफिक व्यवस्थापन, सडक सुरक्षा, जनचेतनामूलक कार्यक्रम तथा राष्ट्रिय–अन्तर्राष्ट्रिय विज्ञहरूको सहभागितामा कार्यशाला सञ्चालन भइरहेको पनि उहाँले बताउनुभयो।
उहाँले नाइमा मोबिलिटी एक्स्पो र नाइमा मासिक मोबिलिटी संवादलाई संस्थागत गरिसकिएको तथा नाइमा मोबिलिटी जर्नल र नाइमा क्षमता अभिवृद्धि तालिम कार्यक्रम सञ्चालनमा ल्याइएको जानकारी दिनुभयो। एक्स्पोबाट प्राप्त टिकट आम्दानीको कम्तीमा १० प्रतिशत अनुसन्धान फेलोसिप र तालिम कार्यक्रमका लागि विनियोजन गरिने तथा सो फेलोसिपअन्तर्गत तयार हुने अनुसन्धान र लेखहरू नाइमा मोबिलिटी जर्नलमा प्रकाशन गरिने उहाँले बताउनुभयो।
नाइमाले आगामी दिनमा नाइमा मोबिलिटी कन्क्लेभ आयोजना गर्ने तथा विशेषगरी शिक्षा मन्त्रालय र नेपाल सरकारसँग सहकार्य गरी मोबिलिटी क्षेत्रमा सीप विकास र रोजगारी सिर्जनामा केन्द्रित कार्यक्रम सञ्चालन गर्ने योजना पनि सार्वजनिक गरेको छ।
पत्रकार सम्मेलनमा सदस्य कम्पनी तथा उद्योगसँग सम्बन्धित पक्षबाट आएको उच्च मागलाई ध्यानमा राख्दै व्यावसायिक मोबिलिटी ब्रान्ड तथा सम्बन्धित क्षेत्रलाई लक्षित गरी थप मोबिलिटी प्रदर्शनी आयोजना गर्ने सम्भावनाबारे पनि नाइमाले विचार गरिरहेको जानकारी दिइयो। स्थान अभावका कारण केही इच्छुक सदस्य र सरोकारवालालाई स्टल उपलब्ध गराउन नसकिएको भन्दै अध्यक्ष वैद्यले नेपालमा अझ ठूलो र आधुनिक प्रदर्शनी पूर्वाधारको आवश्यकता औँल्याउनुभयो।
नाइमा बोर्ड सदस्य सन्दीप शारडाले निजी क्षेत्र राष्ट्रको अर्थतन्त्रको महत्वपूर्ण आधार भएको उल्लेख गर्दै यस्ता प्रदर्शनीले व्यवसाय विस्तार, लगानी प्रवर्द्धन, रोजगारी सिर्जना तथा आर्थिक गतिविधिमा सकारात्मक योगदान पुर्‍याउने बताउनुभयो।
त्यसैगरी, नाइमा अटो शो योजना समितिका संयोजक गौरव शारडाले गत वर्षको अनुभवलाई अझ परिस्कृत गर्दै सन् २०२६ को संस्करणलाई व्यवस्थित, सहज, समावेशी तथा आगन्तुकमैत्री बनाइने जानकारी दिनुभयो। उहाँले यस वर्षको एक्स्पोलाई नेपालको अटोमोबाइल तथा मोबिलिटी क्षेत्रको ऐतिहासिक कार्यक्रमका रूपमा स्थापित गर्न कुनै कसर बाँकी नराखिने प्रतिबद्धता व्यक्त गर्नुभयो।
उहाँका अनुसार मनसुनलाई ध्यानमा राखेर विशेष व्यवस्थापन गरिनेछ भने अपाङ्गता भएका व्यक्तिहरूका लागि पनि प्रदर्शनीस्थल पहुँचयोग्य बनाइनेछ। आगन्तुकका लागि नेपाल पुलिस क्लबमा पार्किङ सुविधा उपलब्ध हुनेछ। पठाओले राइड साझेदारका रूपमा छुटसहितको यात्रा सेवा उपलब्ध गराउनेछ भने युनियन पेले क्यूआरमार्फत टिकट खरिद गर्दा क्यासब्याक सुविधा प्रदान गर्नेछ।
यस वर्षको एक्स्पोको अर्को प्रमुख आकर्षण भनेको नेपाल पुलिस क्लबको ब्लु पेभिलियनस्थित सभाहलमा आयोजना हुने निःशुल्क सिकाइ सत्रहरू हो। यी सत्रहरूमा विज्ञ, पेशाकर्मी, शिक्षाविद्, उद्योग नेतृत्व तथा प्रभावशाली व्यक्तित्वको सहभागिता रहनेछ। सत्रहरूमा मोबिलिटी, प्रविधि, सडक सुरक्षा, उपभोक्ता सचेतना, सीप विकास, रोजगारी तथा नेपालको मोबिलिटी क्षेत्रको भविष्यजस्ता विषय समेटिनेछन्।
एक्स्पोका सह–प्रायोजक ग्लोबल आइएमई बैंक लिमिटेडका तर्फबाट डेपुटी प्रमुख कार्यकारी अधिकृत सुमन पोखरेलले नेपालको सबैभन्दा ठूलो अटोमोबाइल तथा मोबिलिटी एक्स्पोसँग सहकार्य गर्न पाउँदा खुसी लागेको बताउनुभयो। उहाँले मोबिलिटी, आर्थिक गतिविधि, उद्यमशीलता, रोजगारी तथा वित्तीय पहुँचबीच गहिरो सम्बन्ध रहेको उल्लेख गर्दै दीर्घकालीन सहकार्यको सम्भावना रहेको बताउनुभयो। साथै, आगन्तुकका लागि विशेष बैंकिङ तथा सवारीसाधन वित्तीय सुविधा उपलब्ध गराइने जानकारी दिनुभयो।
रेड बुल नेपालका मार्केटिङ प्रमुख श्रय कृष्ण श्रेष्ठले पेय पदार्थ साझेदारका रूपमा एक्स्पोसँग आबद्ध हुन पाउँदा खुसी व्यक्त गर्दै नाइमाले तालिम, जनचेतना, आकस्मिक सहयोग तथा क्षेत्रगत कार्यक्रममार्फत पुर्‍याइरहेको योगदानको प्रशंसा गर्नुभयो। उहाँले एक्स्पो अवधिभर रेड बुलले विभिन्न आकर्षक गतिविधि सञ्चालन गर्ने जानकारी पनि दिनुभयो।
नाइमा नेपाल मोबिलिटी एक्स्पो २०२६ मा ग्लोबल आइएमई बैंक सह–प्रायोजक तथा रेड बुल पेय पदार्थ साझेदारका रूपमा आबद्ध छन्। यसबाहेक विभिन्न बैंक, बीमा कम्पनी, प्रविधि, शिक्षा, ऊर्जा, स्वास्थ्य, सञ्चार तथा कार्यक्रम व्यवस्थापन क्षेत्रका संस्थाहरूले पनि साझेदारका रूपमा सहकार्य गरेका छन्।
नाइमाले बोर्ड सदस्य, सदस्य कम्पनी, अटो शो योजना समिति, सचिवालय, प्रायोजक, साझेदार, प्रदर्शक, सञ्चारकर्मी तथा सम्पूर्ण सरोकारवालाप्रति सहयोग र सहकार्यका लागि आभार व्यक्त गरेको छ।
पत्रकार सम्मेलनको सहजीकरण नाइमाका कार्यकारी निर्देशक राजकुमार दुलालले गर्नुभएको थियो। उहाँले नाइमा एक्स्पोलाई प्रदर्शनीसँगै सिकाइ, ज्ञान आदानप्रदान र अनुभव साझेदारीको उत्कृष्ट मञ्च बनाउने लक्ष्य रहेको बताउनुभयो।