काठमाडौँ । सत्ता परिवर्तन भए संगै पिद्युत प्राधिकरणका कार्यकारी निर्देशक कुलमान घिसिङको ‘पावर’ पनि खुम्चिएकोउद्योगीहरुकोभनाईछ । प्रमुख दुई राजनीतिक दल नेपाली कांग्रेस र नेकपा एमाले मिलेर सरकार सञ्चालनको सम्झौता गरेसँगै पुष्पकमल दाहाल प्रचण्ड नेतृत्वको सरकार ढलिसकेको छ ।
माओवादी सरकार ढल्नासाथ नेपाल विद्युत् प्राधिकरणका प्रबन्ध निर्देशक घिसिङ स्वतः कमजोर बनेका छन् । प्रधानमन्त्री र ऊर्जा, जलस्रोत तथा सिँचाइ मन्त्रीसमेत माओवादी केन्द्रका नै थिए । यसो हुँदा माओवादीसँग नजिक रहेका कुलमान घिसिङले चाहेअनुसार निर्णय गर्ने र गराउने क्षमता राख्दै आएका थिए । यसअघि डेडिकेटेड र ट्रङ्क लाइनको विवादमा घिसिङले गलत रिपोर्टिङ गरेको भन्दै प्रधानमन्त्री नै रिसाएका थिए ।
घिसिङले बालुवाटारमा गरेको रिपोर्टिङ अनुसार प्रधानमन्त्रीले उद्योगीको लाइन काट्न अनुमति पनि दिएका थिए । तर पछि उद्योगीसँगको भेटपछि प्रधानमन्त्री घिसिङसँग रिसाएको बताइएको थियो । त्यसपछि प्रधानमन्त्रीको पहलमा पूर्व न्यायधिश गिरिसचन्द्र लाल नेतृत्वको ३ सदस्यीय छानबिन समिति नै बनेको थियो । समितिले लामो समय लिएर गरेको छानबिनको प्रतिवेदन सरकारलाई बुझाइसकेको छ ।
सरकालाई प्रतिवेदन बुझाउँदै न्यायिक समितिका संयोजक लालले सहजरुपमा कार्यान्वयनमा शङ्का गरेका थिए । उनले भनेका थिए, ‘न्यायिक समितिले अध्ययन गरेर प्रतिवेदन बुझाउने हो । यसलाई कार्यान्वयन गर्ने(नगर्ने पाटो सरकारको हो ।’ लाल नेतृत्वको समितिले २०७२ सालको माघदेखि २०७५ सालको वैशाखसम्मको अवधिको डेडिकेटेड र ट्रङ्क लाइनको बिजुली प्रमाणका आधारमा उठाउन भनेको थियो ।
प्राधिकरणले लाल नेतृत्वको समितिले बुझाएको प्रतिवेदन बमोजिम भन्दै उद्योगीलाई धमाधम बिजुलीको बिल तिर्न ताकेता गरिरहेको छ । समितिले तोकेको अवधिको बिल भन्दै यसअघि पठाइएको रकमबाट घटाउँदै प्राधिकरणले असार २५ गतेसम्मको समय सीमा राखेर उद्योगीलाई बक्यौता भुक्तानी गर्न ताकेता गरेको थियो । प्राधिकरणका प्रबन्ध निर्देशक घिसिङका अनुसार ६१ वटा उद्योगीले जरिवानासहित गरी साढे ८ अर्ब रुपैयाँभन्दा बढी रकम तिर्न बाँकी छ ।प्रचण्ड नेतृत्वको सरकार ढलेसँगै उद्योगीको आत्मविश्वास बढ्दै गएको छ । किनकि, अब सरकारको नेतृत्व एमाले अध्यक्ष केपी शर्मा ओलीले गर्दै छन् । ओलीले पटक–पटक उद्योगीलाई डेडिकेटेड र ट्रङ्क लाइनको नाममा दुख दिन नहुने बताइरहेका छन् । उनले यही २०८१ जेठ अन्तिम साता उद्योगीसँगको भेटमा लाल नेतृत्वको समितिले तयार पारेको प्रतिवेदन कार्यान्वयनमा तलमाथि नहुने बताएका थिए । प्राधिकरणले तारन्तार बक्यौता बुझाउन दबाब दिएपछि उद्योगी अध्यक्ष ओलीलाई भेट्न एमाले पार्टी कार्यालय च्यासल नै पुगेका थिए ।
नेपाल विद्युत् प्राधिकरणले ५ वटा उद्योगको लाइन काटिसकेको छ । प्राधिकरणले जगदम्बा सिन्थेटिक, हुलास स्टिल, रिलायन्स स्पिनिङ मिल्स, अर्घाखाँची सिमेन्ट र जगदम्बा स्टिलको विद्युत् लाइन काटेको छ ।
त्यसक्रममा ओलीले प्राधिकरण र उद्योगीबिचको विवाद समाधान गर्न सरकारले आयोग गठन गरेको र सो आयोगको प्रतिवेदन कार्यान्वयन तलमाथि गर्न नहुने बताएका थिए । त्यसयता प्रचण्डलाई समितिको प्रतिवेदन कार्यान्वयनका लागि ओलीले दबाब दिइरहेका थिए । यसअघि २०८० पुसमा समेत ओलीले उद्योगीको पक्षमा वकालत गरेका थिए । प्राधिकरणले धमाधम लाइन काट्न थालेपछि ओलीले बिजुलीको लाइन काट्नु गलत भएको बताएका थिए । ‘डेडिकेटेड र ट्रङ्क लाइन विवाद बल्झाउँदै उद्योगीको लाइन काट्नु गलत हो,’ ओलीले भनेका थिए ।
यस्तै एक उद्योगीले नाम नखुलाउने सर्तमा सरकार फेरिन साथ घिसिङको शक्ति घट्ने बताउँछन् । ‘यसअघि प्रधानमन्त्रीको काखमा बसेर घिसिङले उद्योगीमाथि दादागिरी देखाए,’ एक उद्योगीले भने, ‘अब सरकार फेरिएपछि हामीलाई सहज हुन्छ । हामीले रकम नतिर्ने नभनेर प्रमाणका आधारमा तिर्ने भनिरहेका छौँ ।’ तर कुलमानले बिना प्रमाण बिल पठाएर तर्साउने र धम्क्याउने गर्नुका साथै लाइन काट्न थालेको ती उद्योगीको भनाई छ । ‘सायद उहाँ उद्योगको लाइन काटेर आगामी चुनावको तयारीमा हुनुहुन्छ,’ ती उद्योगी भन्छन् ।

।

चितवन । जिल्लाको भरतपुर महानगरपालिका २८ स्थित नारायण नदी किनारमा फेला परेको शव सिमलतालमा पहिरोले बगाएको बसको यात्रुको भएको पुष्टि भएको छ । जिल्ला प्रहरी कार्यालयका प्रवक्ता एवं प्रहरी नायब उपरीक्षक भेषराज रिजालले शव बेपत्ता गणपति डिलक्सका यात्रुको रहेको पुष्टि भएको जानकारी दिए ।
‘नदी किनारमा घोप्टो परेको अवस्थामा आज बिहान शव भेटिएको थियो । शवको साथमा केही कागजात पनि भेटिएकाले प्राप्त कागजातको आधारमा शव भारतीय नागरिक ऋषिपल साहको रहेको पुष्टि भएको छ ।’ प्रहरी नायब उपरीक्षक रिजालले भने ।
उनकाअनुसार अहिले शव परीक्षणका लागि भरतपुर अस्पतालको शवगृहमा राखिएको छ ।
साह नेपालमा बसेर काम गर्दै आएका ऋषिका दाई सत्यपाल साहले जानकारी दिए । सत्यपालले आज बिहान फेला परेको शव भाई ऋषिपलको रहेको पुष्टि गरे ।
भारतको मोतिहारी राजमुनुवा घर भएका २८ वर्षीय साह काठमाडौंको जोरपाटीबाट गौर जानका लागि गणपति डिलक्स चढेका थिए ।
काठमाडौंबाट रौतहटको गौरतर्फ आउँदै गरेको गणपति डिलक्सको बस पहिरोमा परेर त्रिशूली नदीमा खस्दा बेपत्ता भएको थियो । बागमती प्रदेश–०३–००१ ख २४९५ नम्बरको बस त्रिशूलीमा खस्दा नन्दन दास, सुरजप्रसाद गुप्ता र जगेश्वर यादव बसबाट हाम फालेर ज्यान जोगाउन सफल भएका छन् ।
भरतपुर महानगरपालिका २९ स्थित सिमलतालमा पहिरो खस्दा दुई वटा यात्रुवाहक बस त्रिशूलीमा खसेको थियो ।
नारायणगढ–मुग्लिन सडकखण्डको सिमलतालबाट बागमती प्रदेश–०३–००६ ख १५१६ नम्बरको एन्जल डिलक्स र गणपति डिलक्स नदीमा खसेका हुन् । शुक्रबारदेखि बेपत्ता बस र यात्रीको खोजी कार्य तीव्र पारिएको प्रहरीले जानकारी दिएको छ ।
एन्जल वीरगञ्जबाट काठमाडौंतर्फ र गणपति काठमाडौंबाट रौतहटको गौरतर्फ जाँदै गरेको अवस्थामा पहिरोमा परेका थिए । दुवै बसमा गरी करिब ६५ यात्री थिए ।
बेपत्ता बस तथा यात्रीको आज बिहानैदेखि नेपाली सेना, नेपाल प्रहरी र सशस्त्र प्रहरीको गोताखोरसहितको टोलीले खोजी गरिरहेको छ ।