काठमाडौं । एमालेका महासचिव शंकर पोख्रेलले प्रचण्ड नेतृत्वको सरकारले राम्रो काम गरे पाँचै वर्ष प्रचण्ड प्रधानमन्त्री हुने बताउनु भएको छ । एमालेको चिन्ता मुलुक, जनता र राष्ट्रको भविष्यप्रति भएको हुँदा प्रधानमन्त्री परिवर्तनको पक्षमा एमाले नभएको दाबी गर्नुभयो ।
कतिपयले आलोपालो प्रधानमन्त्री भनेका छन् । तर हामी यो सरकारले राम्रो काम गर्छ भने यसलाई निरन्तरता दिन तयार छौं । महासचिव पोखे्रलले भन्नुभयो । महासचिव पोख्रेलले गणतन्त्र र लोकतन्त्रको सुदृढिकरणका लागि एमाले सबै पक्षसँग मिलेर जान तयार रहेको बताउनुभयो । उहाँले भन्नुभयो, ‘मुलुकलाई ओरालो यात्राबाट सुरक्षित यात्रामा डो¥याउने कुरा नै प्राथमिकता हो । लोकतन्त्र माथि संकट आएका बेला कांग्रेससँग पनि मिलेर काम गर्नेछौं ।’ उहाँले प्रदेशहरुमा देखिएको अस्थिरता राष्ट्रिय राजनीतिमा भएको कोशी करेक्सनको प्रभाव भएको टिप्पणी गर्नुभयो ।
पूर्व मुख्यमन्त्रीसमेत भईसक्नु भएका पोख्रेलले केन्द्रको राजनीतिक समिकरण अनुसार नै प्रदेश सरकारहरु बनेपछि मात्र मुलुकले स्थायित्व प्राप्त गर्ने दाबी गर्नुभयो ।
