काठमाडौं । प्रधानमन्त्री पुष्पकमल दाहाल ‘प्रचण्ड’ले बाढीपहिरो पीडितको उद्धार र राहतमा सक्रिय हुन नेपाल सरकारका सम्पूर्ण निकायलाई निर्देशन दिएका छन ।
सरकारको प्रयासमा सार्थक हातेमालोका निम्ति राजनीतिक दल, नागरिक समाज र सामाजिक संस्थाहरूसँग पनि उनले अनुरोध गरेका छन ।
‘अविरल वर्षापछि आएको बाढी पहिरोका कारण देशका विभिन्न भूभागमा भएको धनजनको क्षतिप्रति गहिरो दुःख व्यक्त गर्दछु । प्राकृतिक प्रकोपबाट पीडित नागरिकको उद्धार र राहतमा सक्रिय हुन नेपाल सरकारका सम्पूर्ण निकायलाई निर्देशित गर्दछ ।’ प्रधानमन्त्रीद्धारा जारी सूचनामा उल्लेख छ ।
यस वर्ष उच्च वर्षा हुने प्रक्षेपण भइरहेकाले बाढी पहिरोबाट हुनसक्ने सम्भावित क्षति र जोखिम न्यूनीकरण गर्न सरकारले विपद् व्यवस्थापन तथा जोखिम न्यूनीकरण समितिको बैठक राखेर आवश्यक पूर्व तयारीको काम गरिरहेको उनको दाबी छ ।

नवलपरासी । नारायणी नदीमा पानीको सतह निरन्तर बढ्दै गएपछि गण्डक ब्यारेजका सबै ढोका खोलिएका छन् । नवलपरासीबर्दघाट–सुस्तापूर्वको विनयी त्रिवेणी गाउँपालिका–७ स्थित गण्डक बाँध ब्यारेजका सबै ढोका खोलिएका हुन् ।
गण्डक ब्यारेजमा निर्माण गरिएका ढोका बन्द हुँदा विनयी त्रिवेणी–१ बगुबन क्षेत्र डुबानमा परेपछि ब्यारेजका ३६ वटै ढोका खुला गरिएको गण्डक ब्यारेजका सम्पर्क तथा भूआर्जन अधिकृत काशिनाथ हरिजनले जानकारी दिएका छन । गण्डक क्षेत्रमा पानीको बहाव निरन्तर बढ्दै गएपछि ब्यारेजका सबै ढोका खोलिएको उनले जनाए । आज बिहान ७ः०० बजे गण्डक ब्यारेजमा पानीको बहाव चार लाख ४० हजार सात सय ५० क्युसेक मापन गरिएको अधिकृत हरिजनले जानकारी दिए ।
नदीमा शनिबार दिउँसोदेखि पानीको बहाव निरन्तर बढिरहेको छ । अधिकृत हरिजनका अनुसार शनिबार दिउँसो १२ बजे नदीमा पानीको बहाव एक लाख ६१ हजार क्युसेक थियो । त्यसपछि निरन्तर पानीको बहाब बढ्दो क्रममा छ । गण्डक ब्यारेजका सबै ढोका खोलिएपछि सिँचाइका लागि लगिएको नहरको ढोका बन्द गरिएको अधिकृत हरिजनले जनाए।
गण्डक ब्यारेज निर्माण गर्ने बेलामा ब्यारेजको क्षमता नौ लाख क्युसेक भए पनि अहिले ब्यारेज पुरानो भएको कारण पानीको बहाव ६ लाख क्युसेकसम्म धान्न सक्ने जनाईएको छ । ब्यारेजमा पानीको बहाव निरन्तर बढ्दो क्रममा छ ।

लगातारको वर्षापछि सिन्धुपाल्चोक हेलम्बु स्थित चनौटे बजारमा रहेको बेलिब्रिज जोखिममा परेको छ।
हेलम्बुको वडा नम्बर २ र ७ जोड्ने एकमात्रै पुल जोखिममा परेपछि त्यसलाई जोगाउन छेउछाउमा ठुल्ठूला ढुंगा हालिएको गाउँपालिका अध्यक्ष निमा ग्याल्जेन लामाले जानकारी दिए।
२०७८ साउन १६ को भलबाढीले यहाँको पुल बगाएको २०७८ मै सेनाले बेलिब्रिज बनाएको हो।
बाढीले क्षति पुर्‍याएमा मेलम्चीको हेडवर्क्ससँगको पहुँच टुट्नेछ।
त्यतिमात्रै होइन मेलम्चीको दुइटा, पाँच पोखरीको दुइटा र हेलम्बुको तीन वटा वडाबीच सम्पर्कबिच्छेद हुने अध्यक्ष ले बताए।
‘भेमाथानमा पहिरो गयो र त्यो मिसिएर आयो भने अझै खतरा हुन्छ,’ उनले भने।
शनिबार दिउँसो मेलम्चीले खतराको तह पार गरेको थियो।
मेलम्चीमा खतराको तह ५।५ मिटर तोकिएको छ। शनिबार दिउँसो जलसतह बढेर ५।५५ मिटर पुगेको थियो।
साँझसम्म जलसतह केही घटेको छ।
बाढी पूर्वानुमान महाशाखाले साँझ सवा ६ बजे मेलम्चीमा जलसतह केही घटेर चेतावनीको तहमा पुगेको छ।
अहिले मेलम्चीमा जलसतह ५।२८ मिटर छ।
पछिल्लो चौबिस घन्टामा सिन्धुपाल्चोकका धेरै स्थानमा धेरै भारी वर्षासय मिलिमिटभन्दा बढी पानी परेको छ।
मेलम्चीमा १२९ मिलिमिटर, बोल्डेमा ११९ मिलिमिटर, ढुंगेमा ११४ मिलिमिटर, बाँसखर्कमा १०६ मिलिमिटर, गोब्रेमा १०४ मिलिमिटर वर्षा मापन भएको छ।