काठमाडौं सूर्यदर्शन सहकारी ठगी प्रकरणमा आरोपीको थुनछेक बहस कास्की जिल्ला अदालतमा बिहीबार पनि जारी रहने भएको छ । न्यायाधीश नितिज राईको इजलासमा हिजो सरकारी वकिलले बहस सकेपछि आजदेखि जाहेरवाला सहकारी पीडितका कानून व्यवसायीले बहस गर्दैछन् ।
जाहेरवालाका तर्फबाट बहस गर्न १२ जना कानुन व्यवसायीले वकालतनामा पेश गरेको अदालतका श्रेस्तेदार राजन खनालले जानकारी दिए। सबैले बहस नगर्न पनि सक्ने भएकाले जाहेरवालाको बहस सकिए प्रतिवादीका तर्फबाट कानून व्यवसायीले बहस शुरु गर्नेछन् ।
प्रतिवादीका तर्फबाट बहस गर्नका लागि बुधबारसम्म वरिष्ठ अधिवक्तासहित १५ कानून व्यवसायीले वकलतनामा बुझाएको श्रेस्तेदार खनालले बताए। शुक्रबार र आइतबार प्रतिवादीका तर्फबाट बहस सकिए सोमबार जवाफी बहस हुन सक्ने र चाँडोमा सोमबार नै थुनछेक आदेश हुन सक्ने उनले जानकारी दिए।
