भारतको गुजरात राज्यमा शनिबार निजी कम्पनीको निर्माणस्थलमा पर्खाल भत्किँदा ९ जनाको मृत्यु भएको छ।
गुजरातको राजधानी गान्धीनगरबाट ४० किलोमिटर उत्तरपश्चिममा रहेको मेहसाना जिल्लाको काडी शहरको जसलपुर गाउँ नजिकै पर्खाल भत्किएको हो । घटना लगत्तै भग्नावशेषमा पुरिएका मानिसलाई बचाउने प्रयास शुरु भएको छ । उद्धारमा खटिएको टोलीले एकपछि अर्को गरी ९ जनाको शव निकालेको प्रहरीले जनाएको छ।
भग्नावशेषमा अन्य केही मानिस पनि पुरिएको आशंका गरिएको छ। मृत्यु हुनेको संख्या अझै बढ्न सक्ने अधिकारीहरूले बताएको भारतीय सञ्चारमाध्यमले जनाएका छन् ।
एउटा निजी कम्पनीमा ट्याङ्की बनाउन मजदुरहरु खाल्डो खनेको र त्यस क्रममा माटो र जमिनभित्र बनेको पर्खाल भत्किएर घटना भएको जनाइएको छ। दुर्घटनाको कारणबारे अनुसन्धान भइरहेको स्थानीय प्रहरी अधिकारीले बताएका छन् ।
