काठमाडौं । सरकारले नेपाल प्रहरीका एआईजीद्वय उमेश जोशी र भिम प्रसाद ढकाललाई प्रहरी अतिरिक्त महानिरीक्षकमा बढुवा गर्ने निर्णय गरेको छ ।
आजबसेको मन्त्रिपरिषद बैठकले यस्तो निर्णय गरेको सूचना तथा सञ्चार प्रविधिमन्त्री रेखा शर्माले जानकारी दिनुभयो।
त्यस्तै सरकारले समाज कल्याण परिषद्को रिक्तउपाध्यक्ष पदमा सुनसरीका नन्दलाल माझीलाई नियुक्त गर्ने निर्णय गरेको छ ।
मन्त्रिपरिषद्को बैठकले महिला, बालबालिका तथा जेष्ठ नागरिक मन्त्रालयको सिफारिस अनुसार सरकारले उक्त निर्णय गरेको हो ।
त्यस्तै सरकारले आगामी आर्थिक वर्षको नीति तथा कार्यक्रम जेठ १ गते ल्याउने भएको छ । आज बसेको मन्त्रिपरिषद्को बैठकले उक्त निर्णय गरेको हो ।
त्यसैगरी खेलकुद मन्त्रालयको प्रस्तावमा क्रिकेट, कराते र तेक्वान्दोका अन्तर्राष्ट्रिय प्रतियोगितामा पदक जितेका ४२ खेलाडीलाई पुरस्कार वापतको रकम स्वीकृत गर्ने निर्णय गरेको सरकारकी प्रवक्ता रेखा शर्माले जानकारी दिएकी छन् ।

काठमाडौं । हाल देशमा पश्चिमी वायु, स्थानीय वायुका साथै भारतको विहार आसपास बनेको न्यून चापीय प्रणालीको समेत प्रभाव रहेको जनाउँदै जल तथा मौसम विज्ञान विभागले हाल देशभर आंशिकदेखि साधारण बदली रहेको तथा कोशी प्रदेशका एक–दुई स्थानमा हल्का वर्षा भइरहेको बताएको छ ।
विभागका अनुसार आज दिउँसो देशभर आंशिक बदली हुनेछ । कोशी, मधेस बागमती, गण्डकी र लुम्बिनी प्रदेशलगायत देशका बाँकी पहाडी भागका केही स्थानमा मेघगर्जन एवं चट्याङसहित हल्का वर्षाको सम्भावना छ । साथै तराईका केही स्थानमा मेघगर्जन र चट्याङसहित हल्का वर्षाको सम्भावना छ । देशका उच्च पहाडी तथा हिमाली भागका केही स्थानमा हल्का हिमपातको सम्भावना पनि छ ।
आज राति देशभर आंशिकदेखि साधारणतया बदली हुनेछ । कोशी, मधेस, बागमती र गण्डकी प्रदेशका केही स्थानका साथै देशका बाँकी भागका एक–दुई स्थानमा मेघगर्जन, चट्याङ र हुरीसहित हल्कादेखि मध्यम वर्षाको सम्भावना रहेको विभागले बताएको छ । कोशी, बागमती र गण्डकी प्रदेशका उच्च पहाडी तथा हिमाली भागका एक–दुई स्थानमा हल्का हिमपातको सम्भावना छ ।
आगामी २४ घण्टामा देशका कोशी, मधेस, बागमती, गण्डकी र लुम्बिनी प्रदेशलगायत मुलुकका बाँकी पहाडी भागका केही स्थानका साथै बाँकी तराईका एक–दुई स्थानमा मेघगर्जन र चट्याङसहित हल्का वर्षा हुने अनुमान विभागले गरेको छ । देशका उच्च पहाडी तथा हिमाली भागका केही स्थानमा हल्का हिमपातको सम्भावना रहेको जनाउँदै विभागले त्यस क्षेत्रमा दैनिक जनजीवनलगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्ने भएकाले सतर्कता अपनाउन अनुरोध गरेको छ ।

भोजपुर । भोजपुर नगरपालिकाका नगरप्रमुख कैलाश कुमार आलेले विगत लामो समयदेखि विवाद तथा पटक–पटकको ठेक्का रद्दपछि जिल्लावासीको ठूलो दबाबका कारण भोजपुर–दिङ्ला जोड्ने सडक तीव्र गतिमा निर्माण भईरहेको बताउनुभएको छ । जिल्लाको उत्तरी क्षेत्रलाई सदरमुकामसँग सडक सञ्जालले जोड्न उक्त सडक महत्वपूर्ण योजना भएको उहाँको भनाई छ । उहाँको अनुसार भोजपुरको उत्तरी क्षेत्र जोड्ने मुख्य मार्गका रुपमा रहेको भोजपुर–तीनतले–दिङ्ला सडक निर्माणको काम तीव्र गतिमा अगाडी बढीरहेको छ । भोजपुर नगरपालिका–९ पानीट्याङ्कीबाट सुरुभई धापरवर्क, सन्तले, बाघखोर, तीनतले हँुँदै षडानन्द नगरपालिकाको केन्द्र दिङ्ला जोड्ने ५१ किलो मिटर सडकको अक्सफाल्ट प्रविधिको कालोपत्रे गर्ने कार्य अन्तरगत सुरुवाती चरणका कार्य तीव्र गतिमा भइरहेको छ । सडक निर्माणका क्रममा उत्पन्न जग्गा, घर, भवन लगायतका विवाद समाधान गरी निर्माण कार्यमा सहयोग गर्दै आइरहेको नगरप्रमुखको भनई छ । कोशी प्रदेशका तत्कालिन मुख्यमन्त्री राजेन्द्र राईको कार्यकालमा करिब एक अर्ब रुपैयाँ स्रोत सुनिश्चित भई करिब एक अर्ब २१ करोड रुपैयाँमा ठेक्का सम्झौता भएको जनाइएको छ । पहिलो चरणमा भोजपुर सदरमुकाम–तीनतले साढे सत्र किलोमिट ५८ करोड रुपैयाँमा र दोस्रो चरणमा साढे ३३ किलोमिटर ६३ करोड रुपैयाँमा तीनतले–दिङ्ला सडक पिचको ठेक्का सम्झौता क्रम रायमाझी मार्सेली र बानियाँ निर्माण कम्पनीले पाएको थियो । सम्झौता अनुसार पहिलो फेजमा सडक साइड कटिङ, क्लियरेन्स, चौडापार्ने, ग्याविन र रिटेनिङवाल लगाउने, नाली बनाउने काम भईरहेको छ भने, दोस्रो फेजमा चारकिलोमिटर सडक कटिङ्ग, ग्रेडिङ तथा साइड क्लियरेन्स भईरहेको पूर्वाधार विकास कार्यालय भोजपुरका प्रमख ई.रामेश्वर महतोले जानकारी दिनुभयो । मार्सेली जेभीका ठेकेदार श्याम श्रेष्ठले पहिलो चरणको ठेक्का सम्झौतापछि काम सुरु भएको तीन महिनाको अवधिमा १२ किलोमिटर कटिङ र ग्रेडिङ, छ किलोमिटर सम्म ड्रेन, ग्याविन, पिसीसी, स्टोन मेसिनरी, होमपाइप लगायत को कार्य भइरहेको जानकारी दिनुभयो । कम्पनीसँग पर्याप्त स्रोत साधनसँगै फिल्डमा १५० जना कामदार कार्यरत रहेकाले सम्झौता अवधि भित्रै निर्माण सम्पन्न गर्न सकिने ठेकेदार श्रेष्ठको भनाई छ ।